ಹಕ್ (HAQ) ಹಿಂದಿ ಚಲನಚಿತ್ರವು ಕೇವಲ ಒಂದು ಕಲಾಕೃತಿಯಲ್ಲ; ಇದು ಒಂದು ದಾರ್ಶನಿಕ ಪಾಠ. ಭಾರತೀಯ ಸಂವಿಧಾನದ ಮೂಲಭೂತ ತತ್ವಗಳನ್ನು, ಸಮಾನ ನಾಗರಿಕ ಸಂಹಿತೆ (UCC) ಯ ಸೂಕ್ಷ್ಮ ಕಲ್ಪನೆಯನ್ನು ಮತ್ತು ಧರ್ಮಗ್ರಂಥಗಳ ನಿಜವಾದ ಆಶಯಗಳನ್ನು ಅತ್ಯಂತ ಸರಳ ಹಾಗೂ ಪ್ರಭಾವಿ ರೀತಿಯಲ್ಲಿ ಪ್ರೇಕ್ಷಕರಿಗೆ ತಲುಪಿಸುತ್ತದೆ.
ಕಥೆಯು ಮುಸ್ಲಿಂ ಸಮುದಾಯದಲ್ಲಿ ಹೆಣ್ಣಿನ ಮೂಲಭೂತ ಹಕ್ಕುಗಳು ಮತ್ತು ಸ್ವಾತಂತ್ರ್ಯಗಳ ಕುರಿತು ಗಂಭೀರ ಪ್ರಶ್ನೆಗಳನ್ನು ಎತ್ತುತ್ತದೆ. ಚಿತ್ರದ ಜೀವಾಳವಾಗಿ ನಿಲ್ಲುವುದು ಎರಡು ಪ್ರಬಲ ಸಂದೇಶಗಳು: “ಸಾ ವಿದ್ಯಾ ಯಾ ವಿಮುಕ್ತಯೇ” (ಜ್ಞಾನವೇ ವಿಮೋಚನೆಗೆ ದಾರಿ) ಮತ್ತು ಪವಿತ್ರ ಕುರಾನ್ನಲ್ಲಿ ಬರುವ ‘ಇಕ್ರಾ’ (ಓದು, ತಿಳಿದುಕೊ) ಎಂಬ ಪದದ ಅರ್ಥ. ಧರ್ಮವನ್ನು ಅರಿಯದೆ ಪಾಲಿಸುವುದಕ್ಕಿಂತ, ಅರಿತು ಪಾಲಿಸಿದರೆ ಹೇಗೆ ನ್ಯಾಯ ಮತ್ತು ಸಮಾನತೆಯನ್ನು ಸಾಧಿಸಬಹುದು ಎಂಬುದನ್ನು ಚಿತ್ರವು ಸಮರ್ಥವಾಗಿ ನಿರೂಪಿಸುತ್ತದೆ. ಕುರಾನ್ ನ್ಯಾಯ ಮತ್ತು ಸಮಾನತೆಯ ಕುರಿತು ನೀಡುವ ನಿಜವಾದ ಬೋಧನೆಗಳ ಬಗ್ಗೆ ಇರುವ ತಪ್ಪು ಕಲ್ಪನೆಗಳನ್ನು ಇದು ಪರಿಣಾಮಕಾರಿಯಾಗಿ ದೂರ ಮಾಡಿದೆ.
ನಿರ್ದೇಶಕರು ವೈಯಕ್ತಿಕ ಕಾನೂನುಗಳು ಮತ್ತು ಸಾಂವಿಧಾನಿಕ ಹಕ್ಕುಗಳ ನಡುವಿನ ಸೂಕ್ಷ್ಮ ಸಮತೋಲನವನ್ನು ಅತ್ಯಂತ ಪ್ರಬುದ್ಧತೆಯಿಂದ ನಿರ್ವಹಿಸಿದ್ದಾರೆ. ನಂಬಿಕೆ (ಧರ್ಮ), ಕಾನೂನು, ಮತ್ತು ಮಾನವೀಯತೆಯನ್ನು ಈ ಚಿತ್ರವು ಬಹಳ ಸುಂದರವಾಗಿ ಜೋಡಿಸಿದ್ದು, ಈ ಮೂರು ಪ್ರಬಲ ಅಂಶಗಳು ಗೌರವಯುತವಾಗಿ ಸಹಬಾಳ್ವೆ ನಡೆಸಲು ಸಾಧ್ಯ ಎಂಬುದನ್ನು ಮನವರಿಕೆ ಮಾಡಿಕೊಡುತ್ತದೆ. ಚಿತ್ರದ ಜೀವಾಳವಾಗಿರುವ ಕೋರ್ಟ್ ರೂಮ್ನ ಅಂತಿಮ ಮಾತುಗಳು ಪ್ರೇಕ್ಷಕರನ್ನು ಆಳವಾಗಿ ಯೋಚಿಸುವಂತೆ ಮಾಡುತ್ತವೆ.
ನಾಯಕಿ ಯಾಮಿ ಗೌತಮ್ ಅವರ ಅಭಿನಯ ಚಿತ್ರದ ಪ್ರಮುಖ ಆಕರ್ಷಣೆ. ಅವರ ಡೈಲಾಗ್ ಡೆಲಿವರಿ ಮತ್ತು ಪಾತ್ರದ ಮೇಲಿನ ಹಿಡಿತ ಅದ್ಭುತವಾಗಿದೆ. ಅಲ್ಲಲ್ಲಿ ಬರುವ ಹಾಡುಗಳು ಕಥೆಯ ಭಾವನೆಗಳನ್ನು ಹೆಚ್ಚಿಸುತ್ತವೆ ಮತ್ತು ಕೇಳಲು ಚಂದವಾಗಿವೆ. ಸಿನಿಮಾದ ನಿರೂಪಣಾ ಶೈಲಿ ಕೆಲವೊಮ್ಮೆ ಸ್ಲೋ ಅನ್ಸತ್ತೆ, ಆದರೆ ಚಿತ್ರದ ವಿಷಯದ ಮಹತ್ವದಿಂದಾಗಿ, ಆ ನಿಧಾನಗತಿಯು ಒಂದು ದೊಡ್ಡ ಲೋಪವಾಗಿ ಕಾಣುವುದಿಲ್ಲ.
ಸಮಾಜಕ್ಕೆ ಪ್ರಮುಖ ಸಂದೇಶವನ್ನು ನೀಡುವ, ಚಿಂತನೆಗೆ ಹಚ್ಚುವಂತಹ ಉತ್ತಮ ಗುಣಮಟ್ಟದ ಚಲನಚಿತ್ರಗಳನ್ನು ನೋಡಲು ಇಷ್ಟಪಡುವವರಿಗೆ ‘ಹಕ್’ ಖಂಡಿತವಾಗಿಯೂ ಒಂದು ಉತ್ತಮ ಆಯ್ಕೆ. ಒಮ್ಮೆ ನೋಡಲು ಅಡ್ಡಿಯಿಲ್ಲ.
